BREAKING NEWS

MATUKIO MBALI MBALI

HABARI MAGAZETINI

TIZAMA VIDEO

Thursday, October 3, 2013

MAJINA YA AWALI YA MIKOPO KWA WANAFUNZI WA ELIMU YA JUU YATOKA ZANZIBAR

 
BODI ya Mikopo ya Elimu ya Juu Zanzibar, imewapatia mikopo wanafunzi 1000 kwa awamu ya kwanza , mwaka wa masomo 2013/2014 .
Wanafunzi hao ni wa shahada ya kwanza, ya pili na udaktari (PhD) ambao watasoma katika vyuo vya ndani, Tanzania Bara na nje ya nchi.
Wanafunzi wa shahada ya kwanza waliopatiwa mikopo ni 800, shahada ya pili 193 na PhD wanafunzi 7.
Mwenyekiti wa bodi hiyo,Kombo Hassan Juma alisema kati ya wanafunzi hao wanaume ni 513 na wanawake 487 wakiwemo wenye mahitaji maalum.
Alisema kiwango hicho ni sawa na ongezeko la wanafunzi 113 ikilinganishwa na wanafunzi 887 waliopatiwa mikopo mwaka wa masomo 2012/2013.
Alisema mbali ya wanafunzi hao wapya, bodi inaendelea kuwahudumia wanafunzi 1,361 wanaoendelea na masomo katika vyuo vya ndani na wengine 158 walioko nje ya Tanzania .
Mwenyekiti huyo alisema kufuatia uteuzi huo mpya bodi itakuwa na wanafunzi 2,527 wanaohudumiwa kwa mwaka wa masomo 2013/2014, ambapo jumla ya shilingi bilioni 8.7 zimetengwa.
Alisema kati ya fedha hizo, shilingi bilioni 4 zitatumika kwa wanafunzi wanaoendelea na bilioni 4.7 zimetengwa kwa wanafunzi wapya.

Alisema fani zilizopewa kipaumbele ni uvuvi, usimamizi wa biashara, hesabu, masoko, fedha, rasilimali watu, ujasiriamali, utabibu, usimamizi wa hoteli, viwanda, madini, mazingira, mawasiliano na usafirishaji.
Kada nyengine ni kompyuta, ufundi, kilimo cha mazao ya baharini, manunuzi na ugavi, utalii, ualimu wa sayansi na hesabu, mafuta na gesi na ualimu wa sanaa.
Naye Mkurugenzi wa bodi hiyo,Iddi Khamis Haji aliwataka wanafunzi waliobahatika kupata mkopo kurejesha fedha hizo kwa wakati ili ziweze kuwanufaisha wanafunzi wengine.
Aidha alisema changamoto kubwa inayowakabili ni uwezo mdogo wa kifedha ikilinganiswa na idadi ya mahitaji ya wanafunzi ambapo jumla ya fomu 4,310 sawa na asilimia 86 zilikataliwa.
Source - ZanziNews
 
Copyright © 2013 BUSTANI YA HABARI
Powered by WordPress24x7