BREAKING NEWS

MATUKIO MBALI MBALI

HABARI MAGAZETINI

TIZAMA VIDEO

BUSATI LA SIASA

BUSTANI YA MICHEZO

HABARI ZA KIMATAIFA

HABARI ZA KITAIFA

PATA BLOG BOMBA KWA SHILINGI ELFU 40000/= TU

Blog yako itakuwa na mvuto wa pekee huku ikiwa imejaa viungo vyenye kuipendezesha na kuifanya kwa nzuri kuliko

JE BLOG YAKO INA IMAGE SLIDER AU POST FEATURED SLIDER?

Kama jawabu sio basi pata slider itakayoongeza mvuto kwenye blog yako na kuongeza idadi ya watembeleaji kwenye blog yako

VISHA TEMPLATE MPYA KWENYE BLOG YAKO KWA SHILINGI 35000/= TU/a>

Template ni mfano wa vazi la blog,kila vazi zuri humpendezesha mtu hivyo kila template nzuri huipendezesha blog yako

TENGENEZA EMAIL INAYOTUMIA JINA LAKO AU JINA LA MTANDAO WAKO(DOMAIN YAKE) KWA GHARAMA NAFUU

Yaani bado tu unatumia @gmail.com au @yahoo.com wakati una domain kwenye mtandao wako,karibu kwetu tukupatie email yenye jina lako kwa gharama ya shilingi 40000 Kwa email peke yake na shilingi 90000 ikiwa ni pamoja na na kuihost domain kwenye mtandao wako

HAMA KUTOKA BLOGSPOT KWENDA WWW.JINALAKO.COM KWA SH 70000/= TU

Kazi nzuri ni ile ambayo inamuoneka maradadi,pia URL yake ni fupi na yenye kupendeza ,baadala ya kutumia www.jinalako.blogspot.com sasa itakuwa www.jinalako.com

LIKE PAGE YETU ILI UWEZE KUPATA HABARI MOTOMOTO

Thursday, April 30, 2015

MFAHAMU JANUARY MAKAMBA NI NANI,KATIKA MBIO ZA URAISI

JANUARY MAKAMBA: NANI NI NANI URAIS CCM?
HISTORIA YAKE
January Makamba ni mmoja kati ya vijana machachari katika siasa za Tanzania akiwa na sifa kubwa ya kuendesha siasa za kisasa na zinazowavutia vijana wengi. Makamba alizaliwa Januari 28, 1974 mkoani Singida (ana miaka 41 sasa) na ni mtoto mkubwa kati ya watoto wanne wa Mzee Yusuph Makamba. Kwa sasa January ni Naibu Waziri wa Mawasiliano, Sayansi na Teknolojia.
Yusuph Makamba (baba) ni mwanasiasa nguli na mwenye jina kubwa hapa Tanzania akishikilia nyadhifa nyingi ndani ya Serikali na Chama Cha Mapinduzi (CCM). Makamba amestaafu siasa akiwa kwenye nafasi ya Katibu Mkuu wa CCM. Nyadhifa nyingine alizowahi kushika ni pamoja na ukuu wa mikoa kadhaa kwa nyakati tofauti. Mama mzazi wa January anatokea Mkoa wa Kagera na baba yake anatokea Wilaya ya Lushoto mkoani Tanga.
January alisoma katika Shule za Sekondari Handeni na Galanos mkoani Tanga na kisha akaendelea na kidato cha tano na sita katika Shule ya Sekondari ya Forest Hill. Alijiunga na Chuo cha Quincy huko Massachusetts, Marekani kisha akajiunga Chuo Kikuu cha Mtakatifu Yohana kilichoko Minnesota - Marekani na kusomea masomo ya amani (peace studies).
Baada ya kumaliza shahada yake ya kwanza aliendelea na shahada ya pili (uzamili) ya sayansi akibobea katika Uchambuzi na Usuluhishi wa Migogoro kwenye Chuo Kikuu cha George Mason – Marekani, mwaka 2004.
Aliporejea nchini, January alijiunga na Wizara ya Mambo ya Nje na Ushirikiano wa Kimataifa akiwa Ofisa wa Daraja la Pili. Nyota yake ilianza kung’ara kisiasa pale aliyekuwa Waziri wa Mambo ya Nje na Ushirikiano wa Kimataifa, Jakaya Kikwete alipoteuliwa na CCM kuwania urais wa Jamhuri ya Muungano wa Tanzania. January alijiunga na timu ya kampeni ya Kikwete na kusafiri na “rais mtarajiwa” nchi nzima.
Baada ya Kikwete kuingia Ikulu, alimteua January kuwa msaidizi wake katika nafasi ya “Msaidizi Binafsi wa Rais Katika Mambo Maalumu”. Alitumikia wadhifa huo kuanzia mwaka 2005 – 2010.
MBIO ZA UBUNGE
Aliingia rasmi kwenye siasa mwaka 2010 kwa kuomba ridhaa ya CCM kuwa mbunge wa Jimbo la Bumbuli, wilayani Lushoto.
Kwenye kura za maoni za chama hicho, alimshinda mbunge mzoefu, William Shelukindo kwa kupata kura 14,612 dhidi ya 1,700 za Shelukindo. Baada ya kushinda ndani ya chama chake, January hakukutana na mpinzani yeyote kwenye Uchaguzi Mkuu wa mwaka 2010 na hivyo akaingia kwenye rekodi ya wabunge waliopita bila kupingwa.
Katika Bunge la 10 alichaguliwa kuwa Mwenyekiti wa Kamati ya Bunge ya Nishati na Madini na mwaka 2011 chama chake, CCM, kilimteua kuwa katibu wa siasa na uhusiano wa kimataifa akichukua nafasi ya Benard Membe. Alitumikia wadhifa huo ndani ya chama chake hadi mwaka 2012 alipomuachia Dk Asha-Rose Migiro.
Katika Mkutano Mkuu wa Nane wa CCM, January alichaguliwa kuwa kati ya wajumbe 10 wa kamati kuu ya chama hicho kikongwe kutokea upande wa Tanzania Bara akipata kura 2,093.
Mwaka 2012 aliteuliwa kuwa Naibu Waziri wa Mawasiliano, Sayansi na Teknolojia. January ni kati ya wabunge walioanzisha mifuko maalumu kwa ajili ya majimbo yao, mfuko wake unaitwa “Mfuko wa Maendeleo wa Bumbuli” ulioanzishwa Julai 2012 ukiwa na jukumu la kutafuta nyenzo na mapato ya ziada ya kusaidia miradi mbalimbali kwenye jimbo hilo.
MBIO ZA URAIS
Hadi mwaka 2012, January hakuwa na mipango ya kugombea urais, aliwahi kuhojiwa katika kipindi cha mikasi cha televisheni ya EATV, Machi 2012 na kusisitiza kuwa hana mpango na urais lakini Februari, 2014 watu wengi walishtushwa na “onyo” lililotolewa na vikao vya chama chake dhidi yake na wanachama wengine watano kuwataka wasiendelee na “mchezo” wa kampeni za urais kabla chama hicho hakijaanzisha mchakato huo rasmi, ndipo wengi wakaanza kuhisi kuwa naye anausaka urais.
Julai 2, 2012, January aliweka bayana nia yake wakati anahojiwa na Idhaa ya Kiswahili ya BBC, akisisitiza kuwa ni lazima agombee urais kwa sababu Tanzania inamhitaji mtu mwenye sifa kama zake na mtu wa kizazi cha sasa.
Tangu wakati huo, January amefanya mambo mengi ya kuelekea kwenye nia yake hiyo ikiwamo kutoa kitabu maalumu cha maswali 40, kilichoandikwa na mwandishi Privatus Karugendo kikionyesha maswali na majibu ya namna kijana huyu wa kisasa atakavyoweza kupambana na changamoto za urais iwapo chama chake kitampa ridhaa na Watanzania wakamchagua.
NGUVU YAKE
January ni kijana kwa umri na kwa yale ayasemayo. Pia, ikumbukwe kuwa mwaka huu kuna vijana lukuki ambao watapiga kura kuliko wakati mwingine wowote, kwa hiyo chama ambacho kitampitisha rais kijana kwa umri, mwonekano na hata mipango, kina nafasi kubwa ya kuchukua kura nyingi za vijana.
Elimu yake na uzoefu wa kufanya kazi serikalini na Ikulu ikiwa ni pamoja na kuzunguka nchi akijifunza matatizo ya Watanzania ni kati ya mambo muhimu yanayojenga nguvu za January, lakini yote haya hayawezi kuchukuliwa kama uzoefu mkubwa zaidi kumsaidia katika nyanja za uimara wa kiongozi mtarajiwa wa nchi.
Lakini pia nguvu ya baba yake ambaye ameshatangaza wazi kumuunga mkono mwanaye, nayo ni turufu nyingine. Wale waliokuwa wanazikubali siasa za Mzee Makamba watakuwa nyuma yake.
Ni wazi kuwa Mzee Makamba ana mtandao mkubwa na anaweza kutumia mtandao huo kumsaidia mwanaye, January.
UDHAIFU WAKE
January ni kiongozi mwenye mitizamo “tata”. Kuna wakati amewahi kusikika akitamka kuwa “…..Moja ya vitu vitakavyozuia rushwa ni adhabu kali ambayo itaonekana. Kwa nini madikteta wanawaua watu hadharani? Wanachojaribu kukionyesha ni kwamba kama siku moja mtu akijaribu kuwapindua atapelekwa uwanjani na kupigwa risasi hadharani. Lengo ni kuwatia watu hofu.”
Kauli ya namna hii ni hatari kwa kiongozi ambaye anahitaji kuongoza nchi inayoendeshwa kiimla katika baadhi ya masuala na inayopigana kurekebisha nguvu ya demokrasia yake na kuondoa dhana za u - imla.
Mataifa ya sasa yanapigana kusaka haki na kuona haki inatendekea, hayafurahii watu kuuawa na kutawaliwa na madikteta, kauli hii imewahi kujadiliwa na kukosolewa na wachambuzi wengi na January mwenyewe hakuwahi kuirekebisha. Kwa hiyo kwa upande mmoja, anaamini katika demokrasia lakini kwa upande mwingine, anaamini ‘udikteta’. Kwa bahati mbaya, Tanzania haihitaji rais ‘dikteta’ na kufikiri namna hiyo ni udhaifu mkubwa.
Katika Bunge Maalumu la Katiba (BMK), January aliwachukiza vijana wengi wanaomuunga mkono baada ya kuonekana akitetea hoja za Serikali yake hata kama hazikuwa na mashiko.
Jambo hili lilitarajiwa kufanywa na watu wenye umri mkubwa na wanaotetea mfumo uliopo “status quo”. Vijana wenzake kama Ridhiwani Kikwete na Mwigulu Nchemba waliweka misimamo yao katika baadhi ya masuala ya msingi, kwa mfano, Ridhiwani alisisitiza kuwa mchakato ukiendelea bila maridhiano unakuwa haramu.
Hata bunge liliporejea kumalizia kazi, Nchemba alihoji kwa nini fedha za umma ziendelee kutumika kupitisha katiba ambayo haina maridhiano?
Vijana kama January walipaswa kusimamia jambo hili ili jamii ione kuwa wanaweza kuwa viongozi wajao na wasiofuata mkumbo na matakwa ya vyama vyao. Kwa hivyo, January ana taswira ya “ki - chama” kuliko “ujana” na anaweza kuwa rais atakayetetea chama chake zaidi kuliko matakwa ya wananchi kama alivyofanya kwenye BMK.
NINI KINAWEZA KUMFANYA APITISHWE
Ukaribu wa January na Rais Kikwete unatajwa kuwa faida inayomfanya ajione ana nafasi ya kuvuka baadhi ya vizingiti. Watu hawa walifanya kazi pamoja Wizara ya Mambo ya Nje, wakafanya kazi pamoja Ikulu na baadaye wameendelea kufanya kazi pamoja serikalini na ndani ya CCM wakionekana kuwa watu walioshibana. Ukiwa unataka kuongoza nchi na kisha una ukaribu na maelewano na rais aliyepo madarakani hilo ni jambo muhimu sana kwako.
January anajionyesha kama kiongozi wa kisasa, anazungumzia hoja za usasa zaidi kuliko ukale na anasimamia masuala kadhaa vizuri pale anapopewa nafasi. Wakati anaongoza Kamati ya Bunge ya Nishati na Madini alikabiliana na wizara hiyo vilivyo katika tatizo la mgawo mkali wa umeme. Msimamo wake ulikuwa ni kutafuta suluhu ya tatizo hata ikiwezekana baadhi ya masilahi ya wafanyabiashara na viongozi wa Serikali kuguswa. Msimamo wa wakati huo ulimuweka shakani kiuhusiano na vigogo wengi wa sekta hiyo lakini hakujali.
Nilisahau kusema kuwa January ni kijana anayevutia “handsome”. Wanasiasa wa namna hii huuzika kirahisi majukwaani na huwapumbaza wapigakura walio wengi. Uzuri wa mtu, tabasamu lake, ucheshi wake na mvuto wake wa nje hutafsiriwa kama kioo cha usafi wa roho na uadilifu, hata kama vivutio hivyo haviakisi hali halisi ya ndani.
Umakini na uadilifu ni masuala mengine ya msingi aliyonayo na hata Rais Ali HassanMwinyi kwenye dibaji ya Kitabu cha Karugendo cha Maswali 40 juu ya January Makamba, amemuelezea mwanasiasa huyu kama “kijana makini”.
NINI KINAWEZA KUMWANGUSHA?
Kati ya mambo yanayoweza kumwangusha January katika mbio zake za kusaka urais ni suala la Kuhukumiwa kwa umri (ujana). Ujana una changamoto zake katika siasa za Afrika, bara ambalo baada tu ya uhuru, lilisahau harakati za vijana wengi waliolikomboa na kuanza kukasimu madaraka kwa wazee wenye umri mkubwa kwa kisingizio cha “busara za wazee”. Ikiwa CCM itampima kwa kigezo cha umuhimu wa wazee au vijana kwenye kuongoza Ikulu ya nchi, hukumu hiyo inaweza kumuweka nje ya ulingo.
Udhaifu mwingine ni mtandao duni. January hana mtandao wa maana ndani ya CCM na hata nje ya chama chake si mtu wa kujadiliwa katika nafasi hii muhimu. Ili uwe kiongozi wa kisiasa, unahitaji kuwa na mtaji na nguvu ya watu, jambo hili amelikosa na kwa hiyo matarajio yake ya kupitishwa na chama chake ni madogo pia.
Jambo la tatu litakalomuangusha ni kukosa fedha za kutosha. Kwa umri wake, huwezi kusema ana “mapesa ya kutosha”. Hana fedha za kutisha kusaka ridhaa ndani ya CCM. Ukweli halisi ni kuwa, mtu asiye na fedha za kutosha au mitandao ya matajiri wenye fedha za kutosha anakuwa na nafasi ndogo ya kupenya tundu la mchujo wa CCM ili hatimaye agombee urais kupitia chama hicho.
Kwa bahati nzuri, January alishiriki kwenye kinyang’anyiro cha kumsaidia Kikwete kupenya ndani ya chama chake mwaka 2005. Anajua namna Kikwete alivyokuwa amezungukwa na “mtandao mzito” wa watu wenye fedha zao wakati anasaka nafasi hiyo. Anajua nguvu ya fedha ndani ya chama chake kama turufu ya kumuongezea nguvu mgombea, kukosa fedha kunampunguzia nafasi ya kuwashinda wagombea wengine waliojipanga vizuri kwenye eneo hilo.
Jambo la nne linaloweza kumkwamisha January Makamba ni taswira ya baba yake mzazi. Mzee Makamba anaweza kuwa na mtandao mkubwa, lakini katika mtandao huo kuna watu wanaomkubali na wanaomchukia kwa sababu mbalimbali. Hivyo, kama ilivyo kwa wanaoweza kumuunga mkono kutokana na ushawishi wa baba yake, pia wapo watakaompinga kutokana na mzazi wake huyo hivyo, inawezekana “akatwishwa mzigo mzito” ambao haukumstahili, lakini hiyo ndiyo hali halisi.
Lakini pia ripoti ya uchunguzi wa kusuasua kwa CCM iliyoratibiwa na kuwasilishwa na mwana CCM aliyepewa jukumu hilo mwaka 2011, Wilson Mukama, iliweka bayana kwamba Yusuph Makamba (wakati huo akiwa Katibu Mkuu wa CCM) ni mmoja wa watu waliosababisha mkwamo wa CCM na kwamba alikuwa katibu mkuu asiyewajibika, aliyependa makundi na misuguano na viongozi wenzake bila sababu.
Taswira ya Mzee Makamba inaweza kumhukumu kijana wake katika siasa za Afrika ambako huwa inaaminika kuwa ‘mtoto ni zao la baba yake’. Pamoja na Makamba Jr kujitenga na siasa na ukale za baba yake na hata baba yake kuonyesha kuwa anajiweka mbali na mwanaye, wachambuzi wa mambo wanaiona hiyo kama janja tu na kwamba huenda baba na mwana wana mipango ya pamoja ambayo baadaye inaweza kumfanya mwana naye awe na mitizamo ya baba yake enzi za uongozi wake, ukizingatia kuwa aliyemsimamia January katika safari yake yote na kumpigia “chapuo” huku na kule ni baba yake. Tayari Mzee Makamba ametangaza kumuunga mkono January katika safari yake ya kuwania urais.
Kuhusishwa huku kwa January kwenye taswira ya baba yake ni jambo hatari kwake lakini linaloepukika ikiwa litafanyiwa kazi na kuwafanya watu watambue kuwa makosa ya baba si ya mwana, akishindwa kwenye kuwashawishi wana CCM kwenye eneo hili ina maana maadui wa baba yake kisiasa watakuwa pia maadui wa January katika safari yake.
ASIPOPITISHWA (MPANGO B)
Namuona January kama kijana mwenye mipango ya muda mrefu na kwamba iwapo hatapitishwa na chama chake, atagombea ubunge katika Jimbo la Bumbuli na kutegemea nafasi za Baraza la Mawaziri katika Serikali ijayo (iwapo itaundwa na CCM) na kisha namuona kama mwanasiasa mwenye nguvu kubwa na labda mmoja wa wasaka “uteule” wa kugombea urais ndani ya CCM mwaka 2025.
HITIMISHO
Makamba ni kijana wa kupigiwa mfano katika baadhi ya masuala muhimu ambayo amewahi kuyasimamia na yaliyoko kwenye historia yake, ni hazina ndani ya CCM. Namuona mwanasiasa huyu kama “mmoja wa watu muhimu wa kutegemewa” ndani ya CCM kwa miaka inayokuja.
Lakini kwa hali ya kisiasa na ya changamoto zinazoikabili nchi kwa sasa na kwa namna CCM ilivyozidiwa na changamoto ya Ukawa, nadhani inaweza kumkimbia na kutafuta mtu mwingine aliyejijenga zaidi.
Pamoja na kwamba nampa nafasi ndogo ya kupenya katika tundu la sindano, namtakia kila la heri katika kutimiza ndoto na azma yake ambayo ameipanga na kuipigania kwa muda mrefu sasa.
KUHUSU MCHAMBUZI:
Julius Mtatiro ni Mchambuzi wa Masuala ya Kisiasa na Kijamii, ana uzoefu mkubwa wa uongozi wa kisiasa hapa Tanzania. Ana Cheti cha Juu cha Sarufi na Lugha, Shahada ya Sanaa “B.A” katika Elimu (Lugha, Siasa na Utawala), Shahada ya Uzamili ya Utawala na Uongozi (M.A) na ni mwanafunzi wa fani ya sheria (L LB) – Anapatikana kupitia +255787536759,(juliusmtatiro@yahoo.com) Uchambuzi na huu unatokana na utafiti na maoni binafsi ya mwandishi). (Uchambuzi huu umechapishwa na Gazeti la Mwananchi la Jumatano, 29 Aprili 2015).

MFAHAMU EMMANUEL NCHIMBI KATIKA MBIO ZA URAISI CCM


DK. EMMANUEL JOHN NCHIMBI: NANI NI NANI URAIS CCM?
HISTORIA YAKE
Dk Emmanuel John Nchimbi alizaliwa Desemba 24, 1971 mkoani Mbeya, (atafikisha miaka 44 Desemba mwaka huu). Elimu yake ya Msingi aliianzia jijini Dar es Salaam katika Shule ya Msingi Oysterbay kati ya mwaka 1980 – 1986.
Baba yake mzazi, Mzee John Nchimbi kutoka wilayani Songea ni askari mstaafu wa Jeshi la Polisi na wakati anastaafu alikuwa Kamishna Msaidizi wa Polisi (ACP) na Kamanda wa Polisi Mkoa wa Mtwara.
Mzee Nchimbi pia amewahi kuwa Mjumbe wa Halmashauri Kuu ya CCM (NEC) kwa vipindi viwili kupitia kundi la majeshi na baadaye katibu wa CCM wa mkoa, alikoma kushiriki masuala ya kisiasa mfumo wa vyama vingi ulipoanzishwa.
Dk Nchimbi alijiunga na elimu ya sekondari kwenye Shule ya Sekondari Uru kati ya mwaka 1987 – 1989 (kidato cha I – III) halafu akahamia Shule ya Sekondari Sangu na kukamilisha kidato cha nne mwaka 1989 – 1990.
Nchimbi alisoma Shule ya Sekondari ya Forest Hill, Morogoro, masomo ya kidato cha V na VI mwaka 1991 – 1993. Alijiunga katika Chuo cha IDM Mzumbe (Morogoro) na kuhitimu Stashahada ya Juu ya Utawala (mwaka 1994 – 1997).
Wakati anahitimu IDM, pia alichaguliwa kuwa Mjumbe wa Halmashauri Kuu ya CCM (NEC) na mwaka uliofuatia (1998), alichaguliwa kuwa Mwenyekiti wa Umoja wa Vijana wa Chama cha Mapinduzi (UVCCM).
Dk Nchimbi amewahi kuajiriwa na Baraza la Taifa la Usimamizi wa Mazingira (NEMC) kati ya mwaka 1998 – 2003.
Alisoma shahada ya uzamili ya usimamiz wa biashara Chuo Kikuu cha Mzumbe mwaka 2001 – 2003 akibobea kwenye maeneo ya (benki na fedha).
Dk Nchimbi aliteuliwa kuwa Mkuu wa Wilaya ya Bunda (mwaka 2003–2005) na (mwaka 2008 – 2011) alisoma na kufanikiwa kuhitimu shahada ya uzamivu (PhD) katika Chuo Kikuu cha Mzumbe.
Dk. Nchimbi amemuoa Jane na wana watoto watatu.
Dk Nchimbi alirudi nyumbani kwao (Songea Mjini) kuanza harakati za ubunge tangu alipokuwa anaongoza UVCCM. Ilipotimu mwaka 2005, aliingia kwenye kinyang’anyiro cha uchaguzi akakutana na Edson Mbogoro wa Chadema aliyekuwa mpinzani wake mkuu. Dk Nchimbi alisaidiwa na mtandao mkubwa wa CCM na kupata ushindi wa asilimia 67.6 dhidi ya asilimia 30.5 za Mbogoro.
Mara tu baada ya kuwa mbunge, Rais Kikwete alimteua kuwa Naibu Waziri wa Habari, Utamaduni na Michezo, hii ilikuwa Januari 2006, alidumu kwenye wizara hiyo hadi Oktoba 2006 alipohamishiwa kwenye Wizara ya Kazi, Ajira na Vijana – hapa pia alikuwa Naibu Waziri tangu Oktoba 2006 hadi Februari 2008 kisha Wizara ya Ulinzi na Kujenga Taifa ambako pia alikuwa Naibu Waziri hadi Novemba 2010.
Katika Uchaguzi Mkuu wa mwaka 2010, Dk Nchimbi alijitosa tena Jimbo la Songea Mjini. Kampeni za 2010 zilimnyima usingizi pamoja na kuwa chama chake kilikuwa kimechukua asilimia zaidi ya 90 ya vijiji, vitongoji na mitaa mwaka 2009.
Kama kawaida, alipambana tena na Mbogoro wa Chadema na kumshinda kwa mara ya pili, japo safari hii Dk Nchimbi akipoteza takriban ushindi wa asilimia 10 ukilinganisha na mwaka 2005. Katika uchaguzi huo, alipata asilimia 59.9 dhidi ya 37.48 za Mbogoro.
Upandaji vyeo wa Nchimbi uliendelea, Rais Kikwete alimpa Wizara ya Habari, Utamaduni na Michezo akiwa Waziri kamili, alidumu hapo hadi Mei 2012 alipohamishiwa Wizara ya Mambo ya Ndani kabla ya kujiuzulu Desemba 2013 kwa shinikizo, baada ya ripoti ya Kamati ya Bunge ya Ardhi, Maliasili na Mazingira, iliyoongozwa na Mbunge wa Kahama, James Lembeli juu ya “Oparesheni Tokomeza”.
Wakati watu wengi wanadhani Nchimbi aling’olewa uwaziri kwa shinikizo la Bunge, ukweli ni kuwa aliondoka kwa shinikizo la vikao vya CCM, “party caucas”.
Ripoti ya kamati ya Lembeli ilieleza wazi kuwa anayepaswa kuwajibishwa ni waziri mmoja tu (Dk Mathayo David, aliyekuwa Waziri wa Maendeleo ya Mifugo na Uvuvi) lakini “caucas” ya CCM ikawaangushia mzigo wengine watatu akiwamo Dk Nchimbi.
Lembeli aliwahi kukaririwa akisema: “Ripoti ilimtaja Dk Mathayo na sababu tulitoa mle ndani. Hao wengine watatu si kamati, ni mambo ya hukohuko kwenye party caucas. Ndiyo maana mara ya mwisho nilikwenda pale nikasema kuwa (Khamis) Kagasheki (Aliyekuwa Waziri wa Maliasili na Utalii, anaonewa.”
MBIO ZA URAIS
Dk Nchimbi alianza mbio za urais tangu alipokuwa naibu waziri kwenye awamu ya kwanza ya uongozi wa Rais Kikwete lakini nimeambiwa kuwa alikuwa anajipanga kistratejia kwa kuzingatia kuwa mbio hizo ndani ya CCM huhitaji fedha nyingi, ambazo hana.
Lakini kwa sababu amekulia ndani ya CCM amekuwa akifahamu kuwa fedha peke yake si kila kitu na kwamba mtu anayejipanga na kuwa chaguo muhimu hufika mbali.
Ndiyo maana ameendelea kuwa mtiifu kwa chama chake hata alipoondoka katika uwaziri kwani anajua kuwa safari za siasa ndani ya CCM huhitaji utulivu ili ufanikiwe.
NGUVU YAKE
Tangu zamani, Dk Nchimbi ni mmoja wa vijana ambao wamekuwa na ushawishi mkubwa ndani ya CCM, unaweza kumfananisha na Amos Makala, Mwigulu Nchemba, January Makamba na Nape Nnauye, japokuwa kila mmoja ana sifa zake binafsi.
Ushawishi wa Nchimbi uliishi hata alipokabidhiwa jukumu la kuongoza UVCCM iliyokuwa maarufu na imara kuliko hii ya sasa. Vijana kadhaa niliozungumza nao ndani ya CCM wanasema Dk Nchimbi anawavutia katika mambo mengi hadi leo.
Jambo jingine linalompa nguvu, ni bahati. Dk Nchimbi ni mtu mwenye bahati. Miaka yote aliyokaa ndani ya CCM amekuwa mtu wa kupanda ngazi tu, kutoka kuongoza UVCCM hadi kuwa mkuu wa wilaya hadi kuwa mbunge hadi kuwa naibu waziri wa wizara mbili tofauti hadi kuwa mbunge kipindi cha pili hadi kuwa waziri kamili katika wizara mbili kabla hajaondolewa.
Ndani ya miaka 14, amepitia nyadhifa nyingi na harakaharaka, ni bahati iliyoje! Dk Nchimbi ni mchapakazi na rafiki. Alipokuwa Waziri wa Mambo ya Ndani baadhi ya askari wananiambia kuwa ilikuwa rahisi kuwasiliana naye na kumpa malalamiko yao.
Baadhi ya askari kutoka makao ya polisi wananiambia kuwa pamoja na matatizo makubwa wanayokutana nayo kiutendaji na ambayo Serikali imeshindwa kuyatatua, walau hupata liwazo kutoka kwa watendaji ambao wako karibu yao. Dk Nchimbi aliweza jambo hili.
UDHAIFU WAKE
Moja ya udhaifu wa Dk Nchimbi ni ukaidi. anapoamini jambo lake hakupi nafasi ya kukusikiliza. Mathalan, wakati wa vurugu zilizotokana na sakata la gesi Mtwara, wananchi walipata madhara makubwa kukiwa na ushahidi wa wazi wa ubakaji, kuporwa mali zao, kupigwa na askari bila huruma huku wakiwa hawana silaha, kuteswa katika kambi za jeshi bila kupelekwa polisi na mahakamani.
Dk Nchimbi alipokuwa anapewa malalamiko hayo na wananchi, alikuja juu na kusisitiza kuwa Serikali inatekeleza wajibu wake. Kukaa kwake kimya kunamaanisha kuwa ana uwezo pia wa kufumbia macho mambo ya hatari yanapowakabili wananchi ilimradi tu alinde kazi yake na hata chama anachokitumikia.
Kuna nyakati Dk Nchimbi amekuwa kiongozi asiyeweza kutoa majibu kwa maswali magumu juu ya matukio ya hatari, ya kikatili na kuhuzunisha yaliyotokea wakati yeye ndiye mwenye dhamana. Alipokuwa na dhamana ya ulinzi wa ndani wa nchi kuna matukio mengi makubwa yalijitokeza na hadi leo hakuwahi kuyatolea ufafanuzi na majibu ya kutosha.
Moja ni tukio la utekaji na uteswaji wa Dk Stephen Ulimboka lililotokea usiku wa Juni 26, 2012. Kuuawa kwa Mwandishi wa Habari, Daudi Mwangosi, tena akiwa kazini na mikononi mwa vyombo vya Dola Septemba 2, 2012 huko Nyololo, Iringa.
Baada ya kifo cha Mwangosi, Kamanda wa Polisi wa Mkoa ambaye aliingilia majukumu ya kamanda wa polisi wa wilaya kwa kuvamia eneo ambalo Chadema walikuwa wakifungua matawi na kuwa kichocheo cha amri iliyosababisha kuuawa kwa Mwangosi, alipandishwa cheo. Haya yalitokea chini ya uongozi wa Dk Nchimbi.
Pili, ni kupigwa risasi na kuuawa Mwandishi Issa Ngumba (45) wa Radio Kwizera aliyekuwa anafanyia kazi zake katika Wilaya ya Kakonko, Kigoma Januari 2013, katika mazingira ya kutatanisha. Dk Nchimbi akiwa waziri na hadi alipoondoka, tukio hili limebakia tu hewani.
Tatu, tukio la Mwandishi wa Gazeti la Tanzania Daima, Shaaban Matutu kupigwa risasi na polisi akiwa nyumbani kwake Dar es Salaam kwa maelezo kuwa “kimakosa polisi walidhani Matutu ni jambazi”. Pamoja na uzembe huo wa polisi, hakuna hatua zilizochukuliwa.
Nne, siku wa Jumanne ya Machi 5 kuamkia Machi 6, 2013, Mhariri Mtendaji wa New Habari (2006) Ltd, ambaye pia Mwenyekiti wa Jukwaa la Wahariri Tanzania (TEF), Absalom Kibanda alivamiwa na kujeruhiwa vibaya akiwa nje ya lango la kuingilia nyumbani kwake Mbezi Juu, Dar es Salaam.
Kibanda aliumizwa kwa kiwango kikubwa. Alitobolewa jicho la kushoto, akaumizwa vibaya kichwani kiasi cha kusababisha kuvunjika kwa baadhi ya mifupa ya kichwa. Aling’olewa meno mawili na kucha mbili, tena bila ganzi. Watekaji hawa walimkata pingili ya kidole cha pete chini ya kucha na kuondokana nayo.
Hadi Dk Nchimbi anaondoka katika Wizara ya Mambo ya Ndani, masuala yote hayo hayakuwahi kutolewa majibu stahiki na hadi leo watu wanajiuliza nini kilichokuwa kinaendelea. Wakati wa uongozi wake ndipo waandishi wa habari na wanaharakati walipata mateso makubwa.
Pamoja na kuwa Dk Nchimbi hakushiriki kumuua Mwangosi, kumtesa Ulimboka, Kibanda au kuwaua waandishi wengine lakini ilitarajiwa kuwa ataonyesha msimamo imara wa wizara yake dhidi ya wote waliohusika na vitendo hivyo.
Udhaifu huo wa kiusimamizi hauwezi kupita hivihivi bila kuhojiwa na ni moja ya mambo ambayo Watanzania hawana mtu wa kumuuliza, zaidi ya aliyekuwa mlinzi wa usalama wa ndani ya nchi wakati huo, Dk Nchimbi.
NINI KINAWEZA KUMFANYA APITISHWE
Moja ya mambo yanayoweza kumbeba Dk Nchimbi ni kuaminiwa. Taarifa sahihi ndani ya CCM zinathibitisha kuwa yeye ni mmoja kati ya vijana wanaoaminiwa mno na chama hicho “vijana wa chama”, wenye msimamo wa kuitetea CCM muda wote, walio tayari kufanya lolote kwa ajili ya chama chake na waliokulia ndani ya CCM.
Kuaminiwa huku na “mabosi” ndani ya chama, kunamfanya awe na turufu mkononi. Lakini yote haya yanachagizwa na uaminifu wake, katika wizara zote alizopita, hatukuwahi kusikia taarifa zinazothibitishwa kuwa ameshiriki au kukwapua fedha za umma na kuzitumia kwa manufaa yake. Jambo hili linamuinua zaidi.
Pili, dhana ya ujana inambeba. Dk Nchimbi ni mmoja wa vijana ambao wanaonekana kuifahamu CCM na amewahi kuiongoza UVCCM na hivyo anajua mahitaji ya vijana ndani ya CCM na ndani ya nchi. Ukiongezea na sababu kuwa yeye ni kijana, ina maana kuwa yuko kwenye hesabu za CCM ikiwa chama hicho kitahitaji kuwa na mgombea kijana wa kisasa.
Pia, uzoefu unaonyesha kuwa watu wote ambao wamewahi kuongoza nchi hii waliwahi pia kupitishwa kwenye “wizara nyeti”, baadaye imewahi kutokea kuwa wakaingia kwenye rekodi kubwa za uongozi wa nchi.
Wizara hizo mara nyingi huwa ni kama ulinzi wa nchi, mambo ya ndani, mambo ya nje, fedha n.k. Kwa mfano, Rais wa Awamu ya Pili, Ali Hassan Mwinyi aliwahi kuwa Waziri wa Mambo ya Ndani na Benjamin Mkapa, ambaye alimfuatia aliwahi kuongoza Wizara ya Mambo ya Nchi za Nje kama ilivyo kwa Rais Kikwete.
Kama hivyo ndivyo, basi fursa aliyoipata Dk Nchimbi kuongoza Wizara ya Mambo ya ndani inamuweka kwenye ulingo sawa na wenzake na jambo hili lisipuuzwe.
NINI KINAWEZA KUMWANGUSHA?
Jambo moja kubwa linaloweza kumuangusha ni nguvu ya makundi ya wasaka urais ndani ya CCM. Kwa bahati mbaya yeye hayumo kwenye makundi makubwa na jambo hilo ni hatari ikiwa makundi hayo yataizidi CCM nguvu.
Pili, sababu za CCM kumuondoa kwenye Wizara ya Mambo ya Ndani kwa kumpumzisha uwaziri wakati ripoti ya Lembeli juu ya Operesheni Tokomeza haikuwa inamtaja, zinaweza pia kurudi katika majadiliano yatakayohusu upitishwaji wake. Kwamba inawezekana CCM inajua vizuri upungufu wa Dk Nchimbi kwenye usimamizi wa ofisi za umma na ndiyo maana ilikuwa tayari kumwajibisha hata kama kamati ya Bunge haikupendeza hivyo.
Mwisho ni rekodi yake ya utendaji katika wizara alizopitia hususan, Mambo ya Ndani. Kwamba ikiwa CCM inajua vizuri upungufu wa wizara hii nyeti wakati inaongozwa na Dk Nchimbi hasa kuhusu matukio makubwa niliyoyataja kwenye kipengele cha udhaifu na ikiwa chama chake kina uthibitisho kuwa hakutimiza wajibu wake ipasavyo, hukumu yake inaweza kutokea pia kwenye eneo hili.
ASIPOPITISHWA (MPANGO B)
Mpango mmoja mkubwa wa Dk Nchimbi ikiwa hatapitishwa kugombea urais itakuwa kurudi Songea Mjini kugombea ubunge kwa mara nyingine. Wasiwasi wangu ni kuwa, Jimbo la Songea Mjini kwa sasa si zuri kisiasa kwa CCM, wananchi wana malalamiko mengi hivyo atahitaji nguvu kubwa kushinda.
Ikitokea ameangushwa kwenye ubunge, bado atakuwa na nafasi ya kushiriki katika siasa za nchi kupitia nyadhifa za kiuongozi au kiuteuzi ikiwa bado CCM itapewa ridhaa.
HITIMISHO
Kwa kiasi kikubwa, Dk Nchimbi ni mmoja wa vijana wa Kitanzania ambao wana uwezo mzuri akipewa nafasi. Nakumbuka wakati anaongoza pale Bunda akiwa mkuu wa wilaya, alihimiza ujenzi wa sekondari 17 na zikafunguliwa zote siku moja. Amewahi pia kuthubutu kuwavua madaraka na kuwasimamisha maofisa waandamizi wanne wa jeshi la polisi kutokana na ukiukwaji wa maadili, hakuna rekodi sahihi kwa mawaziri wengine wa mambo ya ndani kuwahi kuchukua hatua kama hizo.
Historia yake na ukomavu wa uongozi inamtofautisha kabisa na vijana wenzake kama January Makamba, Dk Hamisi Kigwangalla na Lazaro Nyalandu ambao hawakuanza uongozi ngazi za chini kabisa za chama hicho.
Namuona Dk Nchimbi kuwa ni mmoja wa vijana tishio kabisa kwa wazee wa ndani ya CCM wanaosaka uteule katika uchaguzi wa mwaka huu. Wakati ni ukuta na ukifika tutajua, namtakia kila la heri Dk Nchimbi aendelee na safari yake ya kisiasa kwa utulivu.
KUHUSU MCHAMBUZI:
Julius Mtatiro ni Mchambuzi wa Masuala ya Kisiasa na Kijamii, ana uzoefu mkubwa wa uongozi wa kisiasa hapa Tanzania. Ana Cheti cha Juu cha Sarufi na Lugha, Shahada ya Sanaa “B.A” katika Elimu (Lugha, Siasa na Utawala), Shahada ya Uzamili ya Utawala na Uongozi (M.A) na ni mwanafunzi wa fani ya sheria (L LB) – Anapatikana kupitia +255787536759,(juliusmtatiro@yahoo.com) Uchambuzi na huu unatokana na utafiti na maoni binafsi ya mwandishi). (Uchambuzi huu umechapishwa na Gazeti la Mwanchi la Jumanne, 28 Aprili 2015).

MFAHAMU ANNE MAKINDA NI NANI,KATIKA MBIO ZA URAISI TANZANIA

ANNE SEMAMBA MAKINDA: NANI NI NANI URAIS CCM?
HISTORIA YAKE
Anne Semamba Makinda alizaliwa Julai 26, 1949 mkoani Njombe, zamani sehemu ya Iringa (atafikisha miaka 66, Julai mwaka huu).
Baba yake alikuwa mkuu wa mkoa aliyefanya kazi katika utawala wa Mwalimu Julius Nyerere kwa hiyo Makinda alikulia katika malezi ya watu wa daraja la kati au juu tofauti na Watanzania wengi wa wakati huo.
Alianza masomo yake katika Shule ya Msingi Uwemba iliyoko Njombe na kisha akaenda Shule ya Wasichana Peramiho kwa masomo ya kati “middle school” ambayo yalikuwa ya shule ya msingi. Hii ilikuwa mwaka 1957 - 1964.
Makinda alijiunga kidato cha kwanza mpaka cha nne katika Shule ya Sekondari ya Wasichana Masasi iliyoko mkoani Mtwara mwaka 1965 - 1968, kisha kidato cha tano na sita katika Shule ya Sekondari Kilakala mkoani Morogoro mwaka 1969 - 1970. Shule hii wakati huo ikiendeshwa na masista wa kigeni kutoka shirika la Kikatoliki la Salvatory.
Wakati alipokuwa shule ya msingi, alikuwa mwanachama wa Umoja wa Vijana wa Tanu na alipokuwa akisoma sekondari wilayani Masasi, alikuwa mwenyekiti wa tawi la vijana la Tanu na pia kiongozi wa wanafunzi kwa ujumla. Makinda amekuwa kiongozi tangu akiwa mtoto. Baada ya masomo yake ya Sekondari, Makinda alijiunga na Taasisi ya Maendeleo na Usimamizi ya Mzumbe (IDM) ambacho siku hiki ni Chuo Kikuu cha Mzumbe ambako alihitimu Stashahada ya juu ya Uhasibu mwaka 1971 – 1975.
Alipohitimu Mzumbe, Makinda aliajiriwa na Shirika la Ukaguzi Tanzania (TAC) na alikuwa kwenye uangalizi kabla ya kupewa mkataba wa muda mrefu ndipo alipoamua kujiunga katika siasa za kitaifa.
Pamoja na kuanza harakati za siasa, Makinda bado alijiunga katika Taasisi ya Usimamizi wa Fedha ya Dar Es Salaam (IFM) na kuchukua kozi ya awali ya CPA mwaka 1975 – 1976 na hadi leo yeye ni mhasibu aliyeidhinishwa na kusajiliwa kisheria.
MBIO ZA UBUNGE
Makinda ana rekodi nzito ya kisiasa nchini, huenda kuzidi wanawake wengine wengi tu. Alianza ubunge akiwa na miaka 26 tu, hii ilikuwa mwaka 1975 na alipata fursa hii kupitia kundi la vijana wa CCM na ilikuwa ni lile bunge ambalo pia kina Samwel Sitta waliingia. Makinda ndiye aliyekuwa mbunge mdogo kuliko wote.
Wakati Makinda anajiunga na siasa za kitaifa, ilimpasa kuacha kazi katika Shirika la Ukaguzi Tanzania (TAC). Aliacha mshahara ambao ulikuwa mkubwa mara kadhaa kuliko wa mbunge na kuamua kujiunga na Bunge.
Alikuwa mbunge wa kawaida kwa miaka minane kabla ya kuteuliwa kuwa Waziri wa Nchi, Ofisi ya Waziri Mkuu na Makamu wa Kwanza wa Rais, akiwa anasimamia masuala ya Sera na Udhibiti wa Majanga mwaka 1983 akiwa na miaka 31.
Makinda alikuwa Waziri wa Nchi huku akibadilishiwa majukumu mara kwa mara ikiwamo kushughulikia masuala ya Muungano, Uratibu wa Serikali Kuu hadi mwaka 1990.
Alipewa tena nafasi ya ubunge ndani ya CCM baada ya uchaguzi wa mwaka 1990 na Rais Ali Hassan Mwinyi kwa mara nyingine, akamteua kuwa Waziri wa Maendeleo ya Jamii, Jinsia na Watoto. Aliongoza wizara hiyo hadi mwaka 1995 alipoamua kuchukua fomu ya ubunge wa jukwaani, “kupambana na wanaume” ambao wamezoea kuwa “wanawake ni watu wa kupewa”, Makinda alisema hatasubiri kupewa tena.
Katika Uchaguzi Mkuu wa mwaka 1995, Makinda alipambana na mgombea wa NCCR, Dk Herman Ndembelwa Ngunangwa (PhD) – sasa marehemu.
Dk Ngunangwa huyu ni yuleyule aliyekuwa mbunge wa jimbo hilo la Njombe Kusini mwaka 1990 – 1995 kupitia CCM na alikuwa mmoja wa wabunge maarufu wa “G55” walioongozwa na kina Njelu Kasaka.
Makinda alipata asilimia 49.6 ya kura zote dhidi ya 48.5 za Ngunangwa. Wakati anaendelea na ubunge, pia aliteuliwa na Rais Mkapa kuwa Mkuu wa Mkoa wa Ruvuma mwaka 1995 – 2000 na Katika Uchaguzi Mkuu wa mwaka 2000 alishinda ubunge wa Njombe Kusini kwa mara ya pili na ndani ya Bunge, akapewa jukumu la kuongoza Kamati ya Kudumu ya Bunge ya Maliasili, Mazingira na Kupambana na Umasikini.
Mwaka 2005 alishinda kwa mara ya tatu akipata asilimia 83.3 dhidi ya Martin Juju Danda wa Chadema (sasa kada wa NCCR) aliyepata asilimia 15.6. Makinda alichaguliwa kuwa Naibu Spika wa Bunge la Jamhuri la Muungano wa Tanzania, akadumu kwenye nafasi yake hadi mwaka 2010.
Mwaka 2010 aligombea tena ubunge Njombe Kusini na kupita bila kupingwa na alipotua Dodoma ndipo akachaguliwa kuwa Spika wa Bunge la Muungano.
Kwenye uchaguzi wa Spika, Makinda alipata kura 265 dhidi ya kura 53 za Mabere Marando wa Chadema (kura tisa ziliharibika).
MBIO ZA URAIS
Makinda hajautangazia umma wa Watanzania rasmi kuwa atagombea urais, lakini yeye ni miongoni mwa wanawake walioko ndani ya CCM ambao wanatajwa. Pia ni miongoni mwa makada wanawake wanaohofiwa ikiwa chama hicho kitaamua kumpa mwanamke nafasi ya kupeperusha bendera ya CCM.
Wakati huohuo, minong’ono ya Makinda kutaka kugombea urais inachagizwa na uamuzi wake wa kustaafu ubunge. Makinda ameachana na siasa za jimboni bila kueleza anaelekea wapi na kwa sababu ya ombwe la taarifa hizo, ndiyo anawekwa kwenye orodha ya wanaohisiwa au kupigiwa chapuo na chama chake.
NGUVU YAKE
Makinda ana rekodi nyingi ambazo zinamtofautisha na wanawake wengi. Ni mwanamke pekee (au mmoja wa wanawake wachache sana) ambaye amekuwa mbunge kwa rekodi ya umri mdogo wa miaka 26 tu hapa nchini.
Ndiye mwanamke wa kwanza kuwa Naibu Spika wa Bunge la Tanzania mwaka 2005 na pia mwanamke pekee wa Tanzania ambaye amevunja rekodi ya kuwa Spika wa Bunge la Tanzania. Wanawake wengine hawajavunja rekodi hizi.
Jambo la pili linalompa nguvu ni uwezo wa kujisimamia. Tangu alipokuwa anasoma shule ya msingi na baadaye Sekondari, Makinda amekuwa ni mtu wa kujisimamia na kufuata taratibu na miiko ya kazi yake.
Nidhamu hii ndiyo imemfanya apite safari ndefu mno ya uongozi tangu akiwa na umri mdogo hadi amekuwa mtu mzima.
Makinda ni mtulivu na ana uwezo mkubwa wa kiuongozi. Katika safari yake ya miaka zaidi ya 35 katika uongozi wa nchi, amesimamia kila jambo alilopewa na hakuwahi kuhusika na mambo yenye madhara kiuongozi, yeye ni mtu wa kujikita katika aliloelekezwa na kulisimamia.
Mara kadhaa amewahi kusikika akisema kuwa ‘anapenda kuchapa kazi na anaamini anaweza kutenda kama wanavyofanya wanaume’.
Kwa asili yake, Makinda yuko karibu na watu na ni mtu wa kujichanganya, hajali nani aliyeko mbele yake. Wakati tuko kwenye Bunge Maalumu la Katiba (BMK) angeweza kutembea mita 30 kwenda kuwasalimu wajumbe ambao hawajui kabisa.
Mawaziri wengi katika Baraza la Rais Jakaya Kikwete hawawezi kufanya kama mama huyu, kusalimiana nao ilikuwa hadi wewe uwafuate ukawasalimu, lakini “bosi” huyu wa Bunge la Muungano yeye kwake haikuwa shida, ni mtu wa kujishusha na anajua maana ya uongozi.
UDHAIFU WAKE
Moja ya udhaifu wa Makinda ni kupoteza muda mwingi akitekeleza matakwa ya walio juu yake bila wakati mwingine kuyapa changamoto ili wakubwa watoe mawazo sahihi au maelekezo yanayoeleweka.
Katika uongozi wake wa Bunge, amekuwa mtu mwepesi kwa CCM, mara nyingi Serikali inapata ahueni kubwa katika mijadala yake kwa sababu Makinda hachukui hatua na analiongoza Bunge kama vile ni sehemu ya Serikali. Kuna mahali anapaswa kuchukua hatua akiwa Spika lakini anaishia kusaidiana na Serikali na au kuilinda.
Wakati wa sakata la Tegeta Escrow, Waziri Mkuu, Mizengo Pinda alipaswa kuwa mmoja kati ya watu ambao wangewajibishwa maana madhambi yaliyotendeka yaliihusu Serikali ambayo yeye anaisimamia hata kama hakuhusika moja kwa moja.
Makinda alikuja juu pale alipoona jambo lile linamgusa Waziri Mkuu, alikataa mapendekezo ya PAC yasiwe maazimio ya Bunge hadi yafanyike maridhiano na mjadala. Chelewesha hiyo ndiyo baadaye iliunda kamati iliyokuja na maazimio ya kumuokoa Pinda na kuwatosa mawaziri wake.
Kutokana na utendaji wa namna hiyo, ndipo taswira ya woga na kuogopa mamlaka pia inaweza kujengeka, kwamba mwanamama huyu ana kiwango fulani cha woga unaopaswa kutokuwapo kiuongozi, amekuwa Spika wa Bunge la watu, amechaguliwa na wabunge kwa niaba ya wananchi wa Tanzania.
Alipaswa kutumia ule utaratibu wake wa kuzingatia taratibu, kanuni na misingi bila kuzubaishwa na matakwa ya chama chake. Unapokuwa Spika wa Bunge halafu ukawa unawasaidia mawaziri wanapozidiwa na wabunge, hautoi mfano mzuri wa uongozi.
NINI KINAWEZA KUMFANYA APITISHWE
Makinda ni mwanamke aliyekulia ndani ya mfumo wa uongozi wa nchi na anakijua chama chake vizuri. Kama CCM inahitaji mwanamke anayeitambua mifumo ya uongozi wa nchi na matatizo yake na labda ambaye atathubutu kuziba pale wenzake walipotoboa, huenda yeye ni chaguo sahihi hata kama inaweza kuhojiwa kiwango cha ushiriki wake katika ‘kutoboa’.
Jambo jingine kubwa linalombeba ni “uadilifu”. Makinda ana taswira nzuri kwa jamii na anatoa mfano wa wanawake wa Kitanzania wenye asili ya maadili ya nchi.
Wanawake wa Taifa hili wana taswira ya uadilifu. Makinda tangu enzi na enzi amekuwa akiishi maisha ya kawaida yasiyotumia ofisi za umma vibaya. Jambo hili litambeba sana.
Uzoefu wake serikalini ni kitu kingine kinachomsaidia. Kama nilivyoeleza, amekuwa mkuu wa mkoa kwa miaka zaidi ya mitano, amekuwa waziri kwa miaka takribani 20, amekuwa katika Ofisi ya Spika wa Bunge la Tanzania kwa miaka 10, ameongoza pia umoja wa mabunge ya Afrika na taasisi nyingine za kibunge duniani. Uzoefu wake ni turufu tosha inayombeba.
Kama CCM itaikwepa taswira ya watu au wagombea wenye makundi, Makinda atafaulu mtihani. Hata uingiaji wake kwenye Ofisi ya Spika mwaka 2010 kuwa kiongozi wa Bunge ilitokana na CCM kumkwepa Samwel Sitta.
Makinda hakupewa uspika kama fadhila, bali alionekana ndiye suluhisho pekee na muda wote ambao amekuwa Spika, hajajitambulisha kwenye kambi za urais ndani ya CCM. Hili linamfanya awe mtu muhimu kwenye mbio hizi.
Pamoja na kuwa Makinda ni mwanamama, kuna nyakati nyingi tu anaweza kuwa mkali kupita kiasi na hata mbishi hadi afahamishwe jambo vizuri, lakini pia huwa tayari kushuka chini haraka pale anapoona kuna haja ya kufanya hivyo ili pande zinazosigana zielewane tena. CCM inahitaji mtu wa namna hii ikiwa itahitaji kurudisha nidhamu kama itabahatika kuchaguliwa tena mwaka huu.
NINI KINAWEZA KUMWANGUSHA?
Mambo mawili makubwa yanayoweza kumwangusha Makinda, kwanza ni kuwa na mtandao mdogo ndani ya chama chake.
Ikiwa mteule wa CCM atapimwa na vikao vya chama hicho kwa kigezo cha nani ana watu wengi na kwamba akiachwa chama kitayumba, basi hapa Makinda ataanguka.
Kama nilivyosisitiza awali, Makinda hajafanya harakati za wazi za kusaka urais na hivyo anaweza kuwa mtu ambaye hana kundi kubwa la wafuasi, labda hadi apitishwe na chama.
Dhana ya kuwaogopa wanawake au kuwahofia pia inaweza kumtafuna.
Vikao vya uamuzi vya CCM kama vilivyo vya vyama vingine, vimejaa wanaume kuliko wanawake na mara nyingi hata uamuzi hufanyika kwa wahusika kujisahau ikiwa wanawake ni sehemu yao pia.
Kasumba hii inaweza kuwa mwiba kwa Makinda ukizingatia hofu ileile ya CCM, kuwa vyama vya Ukawa vinaweza kusimamisha mwanamume ambaye anatizamwa na jamii pana ya Watanzania kama kiongozi anayeweza kuliko mwanamke (dhana mbaya).
ASIPOPITISHWA (MPANGO B)
Makinda anahitajika bado kulisaidia Taifa katika nafasi za juu. Mara kadhaa nimemuona akipatanisha wabunge ilipotokea wanagombana kwa kutumia njia rahisi tu. Uanadiplomasia huu unaweza kulisaidia Taifa katika nyanja nyingi ambazo zinahitaji kushughulikiwa.
Wakati huohuo Makinda anaweza kusaidia kukuza sekta ya uhasibu na ukaguzi. Ifahamike kuwa yeye ni mhasibu na mkaguzi kitaaluma na tayari amepata mafanikio makubwa ya kuwa mtu muhimu katika nchi.
Tunafahamu kuwa kati ya maeneo ambayo bado nchi ina matatizo ni kwenye ngazi hizo za uhasibu na ukaguzi.
Fedha nyingi za Taifa zinaibwa kwa sababu ya mianya kwenye sekta hizo, kama anapenda, anaweza kuhamia huko na akatumia ushawishi wake kuanza kuleta mabadiliko chanya kwa vijana.
HITIMISHO
Makinda ni mmoja wa wanawake wachache wenye bahati na bidii kubwa kazini. Historia yake inamhukumu kuwa ni Mtanzania aliyetoa mchango mkubwa kwa Taifa katikati ya mfumo ambao hauwapi wanawake nafasi.
Pia, utumishi wake katika Bunge umelipeleka katika ngazi nyingine kabisa. Bunge analoliacha mwaka 2015 ni tofauti na lile lililoboreshwa na Sitta kisha akaachiwa.
Naamini kuwa atautumia vizuri uzee wake kukamilisha kazi kubwa aliyoifanya hapa Tanzania, lakini yote kwa yote namtakia kila la heri katika hatua nyingine za kiuongozi au ujenzi wa nchi kwa kadri atakavyojiamulia.
KUHUSU MCHAMBUZI:
Julius Mtatiro ni Mchambuzi wa Masuala ya Kisiasa na Kijamii, ana uzoefu mkubwa wa uongozi wa kisiasa hapa Tanzania. Ana Cheti cha Juu cha Sarufi na Lugha, Shahada ya Sanaa “B.A” katika Elimu (Lugha, Siasa na Utawala), Shahada ya Uzamili ya Utawala na Uongozi (M.A) na ni mwanafunzi wa fani ya sheria (L LB) – Anapatikana kupitia +255787536759,(juliusmtatiro@yahoo.com) Uchambuzi na huu unatokana na utafiti na maoni binafsi ya mwandishi). (Uchambuzi huu umechapishwa na Gazeti la Mwanchi la Jumapili, 26 Aprili 2015).

HILI HAPA TAMKO LA UKAWA LA APRIL 30, 2015 LINALOFICHUA SIRI KIBAO

TAMKO LA UKAWA: Alhamisi, 30 Aprili 2015.
Vyama vinavyounda Umoja wa Katiba ya Wananchi (UKAWA) leo vimetoa msimamo wao juu ya njama za kuahirisha Uchaguzi Mkuu unaotakiwa kufanyika Oktoba mwaka huu. UKAWA imesisitiza kwamba kuahirisha Uchaguzi Mkuu huo ni sawa na kumuongezea Rais Jakaya Kikwete na Chama chake cha Mapinduzi muda wa kuendelea kutawala Tanzania.
UKAWA imesema jaribio lolote la kuahirisha Uchaguzi Mkuu kwa kisingizio chochote kile litakuwa kinyume na Katiba ya sasa ya Jamhuri ya Muungano wa Tanzania na litahesabika kuwa ni sawa na mapinduzi dhidi ya Katiba (constitutional coup d’etat). Msimamo wa UKAWA unafuatia kumalizika kwa Kikao cha Viongozi Wakuu wa Vyama vinavyounda UKAWA (UKAWA Summit) kilichofanyika katika Makao Makuu ya Chama cha Wananchi (CUF), jijini Dar es Salaam kati ya tarehe 28 na 29 Aprili mwaka huu.
Akielezea msimamo wa UKAWA juu ya suala hili, mwenyeji wa Kikao hicho na Mwenyekiti wa CUF, Profesa Ibrahim Lipumba, alisema kwamba kuna dalili za kuonyesha kwamba zipo njama za kuahirisha Uchaguzi Mkuu na kumuongezea Rais Kikwete na CCM muda wa kutawala. “Tume ya Taifa ya Uchaguzi (NEC) haijaanza maandalizi yoyote kwa ajili ya Uchaguzi Mkuu licha ya kwamba imebaki miezi sita tu Uchaguzi huo ufanyike kwa mujibu wa Katiba. Shughuli zinazohusiana na maandalizi ya Uchaguzi Mkuu na vifaa vinavyotumika kwa ajili yake ambavyo kwa taratibu za miaka yote huanza kufanyika angalau mwaka mmoja na nusu kabla ya Siku ya Uchaguzi hazijaanza kufanyika, vifaa vinavyohitajika havijanunuliwa na fedha kwa ajili hiyo hazijatengwa hadi sasa.”
Profesa Lipumba aliongeza kwamba jambo hili limefanyika kwa makusudi kwa sababu vyama vya UKAWA vimekuwa vinapigia kelele suala la maandalizi ya Uchaguzi Mkuu tangu mwaka 2012. “Licha ya madai ya muda mrefu ya Kambi Rasmi ya Upinzani Bungeni kwamba ratiba ya Uchaguzi Mkuu wa 2015 imevurugwa kwa makusudi kwa kutokutenga fedha kwa ajili hiyo katika bajeti ya Serikali tangu mwaka 2012, Serikali hii ya CCM haijatoa fedha kwa NEC kwa ajili ya Uchaguzi Mkuu. Badala yake, NEC imeendelea kutangaza kwamba inafanya maandalizi kwa ajili ya Kura ya Maoni kuhusu Katiba Inayopendekezwa ambayo imepitwa na muda kisheria na haiwezi kufanyika tena bila kwanza kufanyika kwa marekebisho katika Sheria ya Kura ya Maoni (the Referendum Act) ya mwaka 2013.”
Kwa mujibu wa Profesa Lipumba, Kura ya Maoni ilitakiwa ifanyike ndani ya siku 124 kutoka tarehe Rais Kikwete alipotoa Tangazo la Kura ya Maoni na kutamka kuwa Kura hiyo itafanyika tarehe 30 Aprili, 2015, yaani leo. Profesa Lipumba alisema: “Kwa Sheria ya Kura ya Maoni ilivyo kwa sasa, hakuna uwezekano wa Kura ya Maoni kufanyika tena bila kwanza kufanya marekebisho ya Sheria hiyo. Kila hatua inayotakiwa kuchukuliwa chini ya Sheria hiyo imewekewa muda wake na muda huo haubadiliki. Tangazo la Kura ya Maoni likishatolewa na tarehe kutangazwa haibadilishwi kwa sababu yoyote ile. Hakuna namna yoyote ya kuahirisha Kura ya Maoni na kuifanya tarehe nyingine yoyote.”
Profesa Lipumba aliongeza: “Haya ndio masharti ya Sheria ya Kura ya Maoni. Yasipofuatwa hakuna namna ya kuyarekebisha bila kwanza kurekebisha Sheria yenyewe. Na hadi sasa Serikali hii ya CCM haijapeleka Muswada wa Sheria kuirekebisha Sheria hiyo ili kuwezesha Kura ya Maoni kufanyika kwa tarehe nyingine. Tunashangazwa na Tume inayoongozwa na aliyekuwa Jaji wa Mahakama ya Rufani ambayo ndio mahakama ya juu kabisa katika nchi yetu, na Mkurugenzi wa Uchaguzi ambaye ni Mwanasheria Mwandamizi wa Serikali, kuendelea kutangaza kwamba Kura ya Maoni itafanyika kwa terehe itakayotangazwa baadae wakati Tume inafahamu kwamba jambo hilo haliwezekani kisheria. Kama bado CCM na washirika wake wanataka Katiba Inayopendekezwa ipigiwe Kura ya Maoni na Watanzania ni lazima wapeleke Muswada wa Marekebisho ya Sheria ya Kura ya Maoni Bungeni. Vinginevyo itakuwa na ubatilifu mtupu kama tuliouona wakati wa Bunge Maalum.”
Aidha, UKAWA imesema haiko na haitakuwa tayari kuunga mkono jitihada zozote za kumuongezea Rais Kikwete na CCM muda wa kutawala kwa kuahirisha Uchaguzi Mkuu wa mwaka huu. Kwa mujibu wa Mwenyekiti Mwenza wa UKAWA na Mwenyekiti wa Chama cha NCCR-Mageuzi, Mheshimiwa James Mbatia, haijawahi kutokea Uchaguzi Mkuu ukaahirishwa kwa sababu yoyote tangu mwaka 1960 tulipofanya Uchaguzi Mkuu uliotupatia Serikali ya Madaraka ya Ndani hadi sasa.
Mheshimiwa Mbatia alisema: “Watu hawa wanafahamu kuwa tumekuwa tukifanya Uchaguzi Mkuu kila baada ya miaka mitano tangu mwaka 1960. Hata mwaka 1980, miezi michache baada ya kutoka vitani dhidi ya nduli Iddi Amin wa Uganda na licha ya Baba wa Taifa Mwalimu Nyerere kutangaza miezi 18 ya kujifunga mikanda kwa sababu ya hali mbaya ya uchumi iliyosababishwa na Vita ya Uganda, hatukuahirisha Uchaguzi Mkuu wa mwaka huo. Watu hawa wanafahamu kwamba Katiba yetu hairuhusu Uchaguzi Mkuu kuahirishwa kwa sababu yoyote ile.
Wanafahamu kwamba tangu mwaka 1985, Rais anatakiwa atumikie vipindi viwili tu vya miaka mitano mitano. Wanafahamu kwamba maisha ya Bunge ni miezi sitini au miaka mitano kuanzia tarehe ya Uchaguzi Mkuu na haiwezekani kwa maisha hayo kuongezewa muda kikatiba bila ya kufanyika Uchaguzi Mkuu.
Na wanafahamu kwamba Rais Kikwete anakamilisha kipindi chake cha pili mwezi Oktoba mwaka huu na maisha ya Bunge la Kumi yanamalizika mwezi huo. Kuruhusu Uchaguzi Mkuu uahirishwe kwa kisingizio chochote kile ni kuwazawadia wazembe na kuwaongezea mafisadi wanaolimaliza taifa letu kwa ufisadi muda wa kuendelea na ufisadi huo. UKAWA haitakubali kuruhusu jambo hilo litokee.”
Aidha, UKAWA imesisitiza kwamba haitakubali na haitaunga mkono jaribio lolote la kufanya marekebisho katika Katiba ya sasa kwa lengo la kumuongezea Kikwete, chama chake na Serikali muda wa kutawala. Akielezea msimamo huo, Mwenyekiti Mwenza wa UKAWA na Mwenyekiti wa chama cha National League for Democracy (NLD) Dkt. Emmanuel Makaidi amesisitiza kwamba suala la vipindi viwili vya miaka mitano mitano kwa Rais wa Jamhuri ya Muungano ni nguzo kuu muhimu ya Katiba ya sasa na UKAWA haitakubali nguzo hiyo iguswe au kufumuliwa kwa sababu au kisingizio chochote kile.
Dkt. Makaidi alisema: “Kubadilisha Katiba ya sasa kwa lengo la kuahirisha Uchaguzi Mkuu wa Oktoba mwaka sio tu kutaathiri misingi muhimu ya Katiba ya sasa, bali pia kutahatarisha amani ya nchi yetu. Tumeona kinachoendelea Burundi baada ya Rais Pierre Nkurunzinza na chama chake kuamua kujiongezea muda wa kutawala nchi hiyo. Tumeona yanaoendelea Jamhuri ya Kidemokrasi ya Congo (DRC) baada ya Joseph Kabila kutaka kufanya hivyo hivyo. Kikwete na wanaCCM wenzake wasitake kuiingiza nchi yetu katika majanga yasiyokuwa na sababu.”
Kwa upande mwingine, UKAWA imeitaka NEC kuhakikisha kwamba wananchi wote wenye sifa ya kuandikishwa kwenye Daftari la Kudumu la Wapiga Kura wanaandikishwa kwenye Daftari hilo. Katika Mkutano wake na vyama vya siasa uliofanyika Dar es Salaam tarehe 9 Julai mwaka jana, Mwenyekiti wa Tume Jaji Damian Lubuva alisisitiza kwamba NEC ilikuwa na uwezo na vifaa vya kuandikisha takriban wapiga kura milioni 24 katika vituo vya kuandikishia 40,000 nchi nzima kwa muda wa siku 14 katika kila kituo cha kuandikishia. Mwenyekiti Mwenza wa UKAWA na Mwenyekiti wa CHADEMA Mheshimiwa Freeman Mbowe alieleza kushangazwa kwa UKAWA na matamko ya Tume kwamba sasa Tume itaandikisha wapiga kura kwa muda wa siku saba katika kila kituo.
Mwenyekiti Mbowe alisema: “Tume iliwaahidi Watanzania kwamba watu wote wenye sifa wataandikishwa katika Daftari la Wapiga Kura. Sisi wa UKAWA tulishauri muda wa kuandikisha uongezwe hadi angalau siku 28 kama ilivyokuwa kwa Uchaguzi Mkuu uliopita lakini Tume iling’ang’ania kwamba muda wa siku 14 unatosha. Leo Tume inapunguza muda huo wakati tunafahamu kwamba Tume ina vifaa pungufu vya kuandikishia wapiga kura kuliko ilivyoomba kupatiwa na Serikali hii ya CCM. Hii ni njama ya Tume na ya Serikali hii ya CCM kuhakikisha wapiga kura wengi hawaandikishwi. Sisi UKAWA hatutakubali jambo hilo litokee.”
Wakati huo huo, Viongozi Wakuu wa UKAWA wameeleza kushangazwa na taarifa zilizosambazwa na baadhi ya vyombo vya habari hapa nchini kwamba Chama cha NCCR-Mageuzi kimejitoa au kimeandika barua ya kuomba kujitoa kwenye UKAWA. Viongozi hao wamesema kwamba taarifa hizo ni uzushi mtupu unaosambazwa na wapiga ramli na wanajimu wa kiama cha UKAWA kwa lengo la kuipatia CCM na vyama vibaraka wake ahueni ya kisiasa.
Akikanusha taarifa hizo, Mwenyekiti wa NCCR-Mageuzi Mheshimiwa Mbatia amesema kwamba yeye mwenyewe na Katibu Mkuu wake Mosena Nyambabe pamoja na maafisa wa chama chake wamekuwa katika hatua zote za vikao vya UKAWA kuanzia Kamati ya Ufundi na ile ya Wataalam hadi Kikao cha Viongozi Wakuu kilichomalizika jana.
Mheshimiwa Mbatia alisisitiza: “Tangu juzi tupo hapa tukijadiliana namna ya kupata wagombea wa UKAWA wa ngazi zote kuanzia Urais, Ubunge hadi Udiwani. Kwa kiasi kikubwa tumeshakamilisha kazi ya kupata wagombea Ubunge wa UKAWA. Tumeshapata muafaka kwa zaidi ya asilimia 95 ya majimbo yote ya Uchaguzi Tanzania, na majimbo 12 yaliyobakia tunaendelea kuyashughulikia na tutayapatia ufumbuzi muda si mrefu. Tunaendelea na majadiliano juu kupata Mgombea Urais na Makamu wa Rais wa Jamhuri ya Muungano atakayepeperusha bendera ya UKAWA.
Tumeshakamilisha kazi hiyo kwa upande wa Zanzibar na tutaikamilisha kwa upande wa Jamhuri ya Muungano katika muda muafaka. UKAWA iko imara sasa kuliko kipindi kingine chochote tangu Bunge Maalum mwaka jana. Hao wanaosambaza uzushi kwamba tumefarakana na kwamba sisi NCCR tumejitoa au tunataka kujitoa watafute hoja nyingine.
Hii imebuma.” Asante Mohammed Ghassani

Monday, April 27, 2015

SERIKALI YAOMBA RADHI KUSITISHA KWA MUDA TANGAZO LA AJIRA ZA WALIMU WALILOTOA JANA TAREHE 27/4/2015


OFISI YA WAZIRI MKUU
TAWALA ZA MIKOA NA SERIKALI ZA MITAA (OWM -TAMISEMI)
TAARIFA KWA UMMA KUHUSU KUONDOLEWA KWA MUDA KATIKA TOVUTI ORODHA YA WALIMU WA MASOMO YA SANAA NA BIASHARA WA SHULE SEKONDARI-
AJIRA MPYA MWAKA 2014/15
Orodha ya wahitimu wa shahada na stashahada waliopangiwa katika
halmashauri mbalimbali inafanyiwa marekebisho baada ya kubainika
kuwa uongozi wa Chuo Kikuu cha Sebastian Kolowa (Sebastian Kolowa University College-SEKUCO) cha Lushoto uliwasilisha orodha ya wahitimuwapatao 491 wa mwaka 2013 ambao walishaajiriwabadala ya wahitimu wa mwaka 2014.Kutokana na sababu hiyo,orodha tajwa imesitishwa kwa muda ili kufanyiwa marekebisho na kuwekwa orodha sahihi itakayojumuisha wahitimuwa SEKUCO wa mwaka 2014.
Tunaomba radhi kwa usumbufu uliojitokeza kutokana na kasoro hiyo.
Imetolewa na
OFISI YA WAZIRI MKUU -TAWALA ZA MIKOANA SERIKALI ZA MITAA
 
Copyright © 2013 BUSTANI YA HABARI
Powered by MAKOO WEBLOG DESIGNER